- Подробности
- Категория: Jamiyatdagi
- Просмотров: 664
Хитой Халқ Республикаси ташаббуси билан 2017 йил 14-15 майда Пекин шаҳрида ўтказилган “Бир макон, бир йўл” форумида мамлакатимиз Президенти ҳам иштирок этиб, халқаро аҳамиятга эга музокараларда қатор келишувларга эришилган эди. Шунга асосан Хитойнинг Ҳебей провинцияси Синтай шаҳридан йўлга чиққан транспорт карвонларида инвестиция кўринишидаги технологиялар “Навоий” эркин иқтисодий зонасига кириб келди.
Ўтган йили иқтисодий ҳудудда Хитойнинг “Hebei New silk Road Import and Еxport trade” компанияси инвестицияси кўмагида “Zyong Tyang” хорижий корхонасига махсус гувоҳнома топширилган эди. Энди ишлаб чиқаришни йўлга қўйиш жараёнлари бошланди. 7,5 миллион АҚШ доллари миқдоридаги инвестициянинг кириб келиши, янги қувватнинг истиқболидан дарак беради. Хусусан, йилига 200 минг дона ДСП фанерлари ишлаб чиқариш имконига эга корхонада 70 дан ортиқ ишчи ўрни яратилади.
Дарҳақиқат, “Навоий” эркин иқтисодий зонасида қатор имтиёзларнинг қўлланилаётгани, ишлаб чиқарувчилар ва хорижлик сармоядорлар учун қулай ишбилармонлик муҳитини яратмоқда. Айни пайтда мазкур ҳудудда фаолият юритаётган 20 га яқин йирик корхоналар зарур имкониятлардан самарали фойдаланаётир.
— “Бир макон, бир йўл” форумида Давлатимиз раҳбари нутқ сўзлаб, табиий, ишлаб чиқариш ва инсон ресурсларига ғоят бой бўлган давлатимизда транспорт, савдо, инвестиция, энергетика ва юксак технологиялар соҳаларидаги лойиҳаларни амалга оширишни қўллаб-қувватлашни таъкидлади, — дейди “Навоий” эркин иқтисодий зонаси дирекцияси директори Азамат Файзиев. — Энг муҳими, Марказий Осиёни Хитой ва Россия орқали Жанубий, Жанубий-Шарқий Осиё ва Европа мамлакатлари бозорлари билан боғлайдиган транспорт-логистика йўналишларини очишга хизмат қиладиган мазкур лойиҳа қадимги Буюк Ипак йўлининг қайта тикланиши дея баҳоланмоқда. Хитойлик сармоядорлар билан Навоийда амалга оширилаётган мазкур иқтисодий ҳамкорлик ҳам мустаҳкам алоқаларнинг ўрнатилаётганини англатади.
Хорижлик инвесторларнинг юртимиз бозори, айниқса, “Навоий” эркин иқтисодий зонасини танлаганининг асосий омили, бу ерда тадбиркорлар учун қулайлик, қурилиш маҳсулотларига ички талабнинг юқорилиги, энг муҳими, хом ашёнинг мўллигидадир. Чунки, қурилиш маҳсулотлари ишлаб чиқаришга ихтисослашган корхона учун зарур ресурслар вилоятнинг ўзида мавжуд.
— Дастлаб, ДСП фанерлари ишлаб чиқариш линиясини ишга туширишни мўлжаллаганмиз, — дейди “Zyong Tyang” хорижий корхонаси бош директори Лю Пеифенг. — Маҳсулот тайёрлашда хом ашё захирасини Қизилтепа туманидан олишни режалаштирганмиз. Мазкур туман далаларида етиштириладиган ғўза поясидан кенг фойдаланамиз. Махсус ингриедентлар эса “Навоийазот” акциядорлик жамиятидан олинади. Бу дегани маҳсулот таннархининг арзонлашиши, импортнинг кескин қисқаришидан дарак беради.
Корхона шунингдек, МДФ ва фанер ишлаб чиқариш, шиша маҳсулотлари тайёрлашни ҳам режалаштирган.
Нуриддин РАҲИМОВ.
Суратлар муаллифи
Сирож АСЛОНОВ.
07.05.2018
- Подробности
- Категория: Jamiyatdagi
- Просмотров: 687
Ўзбекистон Республикаси Президентининг 2018 йил 16 апрелда эълон қилинган “Иккинчи жаҳон уруши қатнашчиларини рағбатлантириш тўғрисида”ги фармонига мувофиқ уруш қатнашчилари ва ногиронларига 5 000 000 сўм пул мукофоти тантанали вазиятда топширилади. Худди шу куни Президентимизнинг “Хотира ва қадрлаш кунига тайёргарлик кўриш ва уни ўтказиш чора-тадбирлари тўғрисида”ги қарори ҳам қабул қилинди.
Ушбу ҳужжатлар мамлакатимизда инсон қадри, шаъни ва ғурури нақадар сарбаланд эканлигига яна бир кафолатдир.
Муҳтарам Президентимиз қарорида Иккинчи жаҳон уруши қатнашчиларининг хоҳиш-истакларига кўра улар ўзлари жанг қилган мамлакатларга бир нафар кузатувчи билан сафарга бориб келиши, Ялта ва Кисловодск шаҳарларидаги “Ўзбекистон”, мамлакатимиз ҳудудидаги бошқа санаторийларга бир нафар кузатувчиси билан бирга бепул юборилиши, уларнинг зарур авиа ва темир йўл чипталари билан таъминланиши алоҳида белгилаб қўйилган.
Фронт орти меҳнат фахрийлари, мустақиллик йилларида хизмат бурчини бажариш чоғида ҳалок бўлган ҳарбий хизматчилар ва ҳуқуқни муҳофаза қилиш органлари ходимларининг оила аъзоларига моддий ва маънавий ёрдам кўрсатилади.
Туманимиздаги Иккинчи жаҳон уруши қатнашчилари уч нафарни, фронт орти меҳнат фахрийлари эса 163 нафарни ташкил этади.
Дўрман маҳалласида яшовчи 98 ёшли Пирназар бобо Турдиев қирғинбарот уруш йилларининг бошидан охиригача қатнашганлар. 1946 йили қайтганлар. Отахон қишлоқ хўжалигининг турли соҳаларида ишлаб, нафақага чиққанлар. Шуниси алоҳида эътиборлики, Пирназар бобо ҳозиргача ҳам ҳовлидаги томорқасида ўзлари ишлайдилар. Маҳаллада томорқа маданияти бўйича ҳамқишлоқларига маслаҳатлар берадилар. МФЙ йиғилишларида бу фидойи бобомиз ёшларимизни деҳқончиликка, боғдорчиликка, чорвачиликка, бошқа соҳаларга йўналтириш зарурлигини уқтирадилар. Пирназар бобо давлатимиз раҳбарининг юксак инсонпарварлик сиёсатини ҳар томонлама қўллаб-қувватлайдилар ва дориломон замонлар учун шукроналар айтадилар.
93 ёшли Ялла бобо Равшанов ҳам Иккинчи жаҳон урушида фашист газандаларига қарши курашганлар.
Ленинград қамалида азобли кунларни бошдан кечирган Замиля ая Ханбекова умрининг 93 баҳорини қаршилади. Улар фарзандлари, невара-чеваралари, аввало, эл-юртимиз ардоғида.
Вилоятимиз ҳокими Қобил Турсунов, туманимиз ҳокими Фахритдин Умаров, маҳалладошлар доимо уларнинг ҳол-аҳволидан хабардор бўлиб турибдилар. Бу нуронийларимиз сиҳатсаломатлиги тиббиёт ходимларининг доимий назоратида.
Давлатимиз раҳбарининг юқорида қайд этилган фармони ва қарори ижроси зиммамизга улкан масъулият юклайди. Аллақачон маҳаллалар, мутасадди ташкилотлар билан ҳамкорликда ишларни бошлаб юборганмиз. Ҳеч ким эътибордан четда қолмайди.
Иккинчи жаҳон уруши иштирокчилари, фронт орти меҳнат фахрийлари муҳтарам Президентимизнинг оқилона сиёсатини қўллаб-қувватлаш билан бирга ёшларимиз тарбиясига, тўй-маъракаларни ташкил этишга, ободонлаштириш ишларига доимо бош-қош бўлмоқдалар.
Даҳшатли урушдан омон қолган фахрийларимиз ҳамиша эл ардоғида бўладилар. Улар бизнинг фахримиздир.
К. ҚУРБОНОВ,
туман “Нуроний”
жамғармаси раиси.
27.04.2018
- Подробности
- Категория: Jamiyatdagi
- Просмотров: 778
Олий Мажлис Сенатининг ўн тўртинчи ялпи мажлисида маъқулланган “Ўзбекистон Республикаси уй-жой коммунал хизмат кўрсатиш соҳаси ходимлари кунини белгилаш тўғрисида”ги қонунга кўра 18 апрель – Уй-жой коммунал хизмат кўрсатиш соҳаси ходимлари куни сифатида белгиланган эди.
Мамлакатимизда бу соҳада кенг кўламли ислоҳотлар амалга оширилмоқда. Хусусан, уй-жой коммунал хизматлар кўрсатиш, кўп хонадонли уй-жой фондидан фойдаланиш, шунингдек хусусий уй-жой мулкдорлари ширкатларининг молиявий-иқтисодий барқарорлигини ошириш бўйича самарали ва сифатли янги тизим шакллантирилди.
Бугунги кунда Кармана тумани Уй-жой коммунал хизмат кўрсатиш бўлимида томонидан ҳам ҳудудда жойлашган кўп қаватли уй-жойларнинг техник ҳолатини мониторинг қилиш, уларга туташ ҳудудларни ободонлаштириш, ичимлик суви, табиий газ ва электр энергияси таъминоти ҳамда бошқа коммунал хизматларнинг сифатини яхшилаш борасида эътирофли ишлар амалга оширилмоқда.
— Туман ҳокимлиги билан ҳамкорликда “Сардоба” маҳалла фуқаролар йиғини ҳудудида жойлашган 26 та кўп қаватли уйларнинг кириш йўлаклари мукаммал таъмирдан чиқарилди, — дейди бўлим бошлиғи Мақсуд Эгамов. — Яроқсиз ҳолга келиб қолган дераза ромлари замонавийсига алмаштирилди. Ушбу ишларни амалга ошириш учун 18 миллион сўмдан ортиқ маблағ сарфланди. Бундан ташқари, ушбу маҳалладаги 7 та кўп қаватли уйнинг том қисми 100 миллион 700 минг сўмга профностиль қопламаси билан таъмирланди. Бу каби чора-тадбирлар куз-қиш пайтида юзага келиши мумкин бўлган муаммоларнинг олдини олишда муҳимдир.
Бўлим томонидан жорий йил сўнгига қадар яна 7 та уйнинг том қисмини мукаммал, 34 уйнинг том қисмини жорий таъмирлаш, 69 та уйда жами 81 та кириш йўлакларига темир эшиклар, чироқлар ўрнатиш ва бошқа шу каби ишларни бажариш кўзда тутилган.
Соҳа ходимлари туманимиздаги маҳаллаларда бўлиб, уй-жойлар атрофини ободонлаштириш, кўкаламзорлаштириш, энг муҳими инсонларда “Шу уй меники, унинг тоза-озодалигига мен жавобгарман” деган туйғуни шакллантириш юзасидан учрашувлар ҳам ўтказмоқда.
Ўз хизматлари билан фуқаролар яшаш шароитларини яхшилашга ҳисса қўшаётган соҳа ходимларини касб байрамлари билан муборакбод этамиз.
Темур БАЙБИКОВ.
24.04.2018
- Подробности
- Категория: Jamiyatdagi
- Просмотров: 658
Юртимизда амалга оширилаётган бунёдкорлик ишлари чекка-чекка ҳудудларда ҳам жадал давом этиб, жойларда аҳоли учун кенг қулайликлар яратилаяпти. Вилоятимизда янги-янги объектлар қад ростлаётгани шаҳар-туманлар файзига ўзгача шукуҳ бағишламоқда.
Ўтган ҳафта воҳамизда 4 та замонавий объект бир кунда фойдаланишга топширилди. Кенг жамоатчилик, корхона-ташкилотлар раҳбарлари ҳамда журналистлар иштирок этган тантанали тадбирларда вилоят ҳокими Қ. Турсунов қатнашиб, халқаро андозадаги муассасалар, улардаги шарт-шароит ва имкониятлар, қулайликлар борасида сўз юритди ҳамда барчани қутлади.
Туманимизнинг “Сардоба” маҳалла фуқаролар йиғинида “Қалдирғоч” нодавлат мактабгача таълим муассасаси қуриб битказилди. 120 ўринга мўлжалланган муассаса жами 2 миллиард 300 миллион сўм маблағ эвазига тадбиркор Мавлуда Мўйинова томонидан қурилиб, фойдаланишга топширилди. Замон талабидаги ушбу муассаса аҳолига ҳар томонлама қулайлик туғдирмоқда.
— Бизнинг маҳалламизда ҳам замонавий боғча барпо этилганидан мамнунман, — дейди маҳалла фуқароси Г. Сайфуллаева. — Боғчадаги барча қулайликлар фарзандларимизнинг баркамол вояга етиши, эртанги катта ҳаёт йўлида зарур билим ва кўникмаларни эгаллашида муҳим омилдир. Айниқса, тарбиячиларнинг олий маълумотли ва тажрибали мутахассислар экани мени қувонтирди. Эртамиз эгаларининг келажагини ўйлаб амалга оширилаётган ислоҳотлар учун Президентимизга раҳмат айтаман.
Тадбиркор яқинда муассаса атрофидаги 10 сотих ерга қўшимча иссиқхона ташкил этишни ҳам ният қилган.
Айни кунда вилоятимизда 26 минг нафар болажон мактабгача таълим муассасаларига қамраб олинган. Эндиликда 10 минг ўринга мўлжалланган 118 та нодавлат мактабгача таълим муассасаси фаолиятини йўлга қўйиш ишлари юзасидан амалий ишлар олиб борилаяпти. Жумладан, бугунга қадар 80 нафар тадбиркорга туман ва шаҳар ҳокимлари қарорлари билан ер майдонлари ажратиб берилди.
Ҳозирда 23 нафар тадбиркор томонидан қурилиш-монтаж ишлари давом этмоқда. Ушбу муассасалар йил охиригача фойдаланишга топширилиши режалаштирилган.
Ўз мухбиримиз.
- Подробности
- Категория: Jamiyatdagi
- Просмотров: 1021
ХУСУСИЙ ТИББИЁТ ЯНАДА РИВОЖЛАНМОҚДА
Туманимизда “Grand-Medical center” хусусий оилавий клиникаси иш бошлади.
Мамлакатимизда соғлиқни сақлаш тизимини ислоҳ қилиш, жумладан, давлат тиббиёт муассасалари билан бир қаторда хусусий тармоқ фаолиятини ривожлантиришга ҳам алоҳида эътибор қаратилаётир. Хусусан, вилоятимизда ҳам соғлиқни сақлаш тизимида хусусий секторнинг улушини кенгайтириш борасида тизимли ишлар амалга оширилаяпти. Бунда Ўзбекистон Республикаси Президентининг 2017 йил 1 апрелдаги “Соғлиқни сақлаш соҳасида хусусий секторни янада ривожлантириш чора-тадбирлари тўғрисида”ги қарори муҳим дастуриламал бўлмоқда.
Айни пайтда вилоятимизда хусусий тиббиёт муассасалари томонидан рухсат этилган ихтисосликлар бўйича аҳолига малакали ва сифатли тиббий хизматлар кўрсатилмоқда.
Мазкур замонавий клиникада 6 та йўналишда аҳолига тиббий хизмат кўрсатиш йўлга қўйилди. 20 нафар тиббиёт ходими меҳнат қилаётган муассасада хориждан энг замонавий жиҳозлар келтирилган.
– Клиникамизга малакали мутахассислар жалб этилган, – дейди “Grand-Farm Avitsenna” ва “Grand-Medical center” масъулияти чекланган жамияти директори Ғолиб Каримов. – Айниқса, хорижлик мутахассислар ҳамда пойтахтимиздаги малакали шифокорлар ўртасидаги доимий ҳамкорлик алоқаларининг ўрнатилгани аҳоли саломатлиги йўлида муҳим омил бўлмоқда. Мамлакатимизда хусусий тиббиёт муассасаларига яратилган имтиёзлардан фойдаланиб, ноль фоиз ставкаси билан 3 йил муддатга 120 минг АҚШ доллари кредити эвазига хориждан энг сўнгги русумдаги тиббий жиҳозларни харид қилдик. Айни пайтда республикамизнинг марказий тиббиёт муассасалари шифокорлари аҳолини тиббий кўрикка жалб этиб, зарур муолажалар кўрсатмоқда. Яқин кунларда Ҳиндистоннинг Аполло клиникаси шифокорларини марказимизга таклиф этиб, аҳолини малакали кўрикдан ўтказиш баробарида, маҳаллий мутахассислар билан маҳорат дарслари ўтказиш режалаштирилмоқда. Муассасамизда махсус фитобар ҳам ташкил этилган.
Эндиликда, клиникани замонавий тиббиёт жиҳозлари билан таъминлаш, тиббий хизмат сифати ва турини кенгайтириш борасида тизимли ишлар амалга оширилмоқда. Хусусан, клиникада оператив бўлим ташкил этиш, пировардида қўшимча 15 янги иш ўрни яратиш борасида изланишлар бошланган.
– Янги шифохонага келиб, касаллигим бўйича қимматли маслаҳатларни олдим, – дейди Зарафшон шаҳрида яшовчи Чаман Хайруллаева. – Етти йилдан бери қон босими безовта қилиб келарди. Пойтахтдан келган малакали кордиолог шифокор кўрикдан ўтказиб, шифо топишим учун керакли муолажаларни олишимни тавсия қилди. Маслаҳатлари менга жуда маъқул, айниқса, клиникадаги шароитлар жуда қулай.
Президентимизнинг юқорида номи қайд этилган қарорида хусусий тиббиёт муассасалари фаолиятининг ҳуқуқий ва амалий механизмларини янада такомиллаштириш, сифатли тиббий хизмат кўрсатиш учун зарур шароитлар яратиш, тармоқнинг барқарор ривожланишига тўсқинлик қилаётган масалаларни тизимли ҳал этиш чора-тадбирлари белгиланган.
Хусусан, хусусий тиббиёт муассасалари 2022 йилнинг 1 январига қадар барча турдаги солиқлар ва мажбурий ажратмалар тўлашдан озод этилгани катта имтиёздир. Шу пайтгача хусусий тиббиёт муассасаларига 177 турдаги тиббий хизматнинг 50 тасига рухсат берилган эди. Қарорга биноан энди хусусий шифо муассасаларига тиббий хизматларнинг деярли барча турларини кўрсатишга рухсат берилди. Бу имконият аҳоли, айниқса, чекка ҳудудлардан шифо излаб келган беморлар учун ҳам қулайлик яратади.
Нуриддин РАҲИМОВ.
Суратлар муаллифи
Сирож АСЛОНОВ.
