Подробности

Категория: Jamiyatdagi

Просмотров: 576

 Юртимизда амалга оширилаётган бунёдкорлик ишла­ри чекка-чекка ҳудудларда ҳам жадал давом этиб, жойларда аҳоли учун кенг қулайликлар яратилаяпти. Вилоятимизда янги-янги объектлар қад ростлаётгани шаҳар-туманлар файзига ўзгача шукуҳ бағишламоқда.

Ўтган ҳафта воҳамизда 4 та замонавий объект бир кунда фойдаланишга топширилди. Кенг жамоатчилик, корхона-ташкилотлар раҳбарлари ҳамда журналистлар иштирок этган тантанали тадбирларда вилоят ҳокими Қ. Турсунов қатнашиб, халқаро андозадаги муассасалар, улардаги шарт-шароит ва имкониятлар, қулайликлар борасида сўз юритди ҳамда барчани қутлади.

Туманимизнинг “Сардоба” маҳалла фуқаролар йиғинида “Қалдирғоч” нодавлат мактабгача таълим муассасаси қуриб битказилди. 120 ўринга мўлжалланган муассаса жами 2 миллиард 300 миллион сўм маблағ эвазига тадбиркор Мавлуда Мўйинова томонидан қурилиб, фойдаланишга топширилди. Замон талабидаги ушбу муассаса аҳолига ҳар томонлама қулайлик туғдирмоқда.

— Бизнинг маҳалламизда ҳам замонавий боғча барпо этилганидан мамнунман, — дейди маҳалла фуқароси Г. Сайфуллаева. — Боғчадаги барча қулайликлар фарзандларимизнинг баркамол вояга етиши, эртанги катта ҳаёт йўлида зарур билим ва кўникмаларни эгаллашида муҳим омилдир. Айниқса, тарбиячиларнинг олий маълумотли ва тажрибали мутахассислар экани мени қувонтирди. Эртамиз эгаларининг келажагини ўйлаб амалга оширилаётган ислоҳотлар учун Президентимизга раҳмат айтаман.

Тадбиркор яқинда муассаса атрофидаги 10 сотих ерга қўшимча иссиқхона ташкил этишни ҳам ният қилган.

Айни кунда вилоятимизда 26 минг нафар болажон мактабгача таълим муассасаларига қамраб олинган. Эндиликда 10 минг ўринга мўлжалланган 118 та нодавлат мактабгача таълим муассасаси фаолиятини йўлга қўйиш ишлари юзасидан амалий ишлар олиб борилаяпти. Жумладан, бугунга қадар 80 нафар тадбиркорга туман ва шаҳар ҳокимлари қарорлари билан ер майдонлари ажратиб берилди.

Ҳозирда 23 нафар тадбиркор томонидан қурилиш-монтаж ишлари давом этмоқда. Ушбу муассасалар йил охиригача фойдаланишга топширилиши режалаштирилган.

Ўз мухбиримиз.

Подробности

Категория: Jamiyatdagi

Просмотров: 947

ХУСУСИЙ ТИББИЁТ ЯНАДА РИВОЖЛАНМОҚДА

Туманимизда “Grand-Medical center” хусусий оилавий клиникаси иш бошлади.

Мамлакатимизда соғлиқни сақлаш тизимини ислоҳ қилиш, жумладан, давлат тиббиёт муассасалари билан бир қаторда хусусий тармоқ фаолиятини ривожлантиришга ҳам алоҳида эътибор қаратилаётир. Хусусан, вилоятимизда ҳам соғлиқни сақлаш тизимида хусусий секторнинг улушини кенгайтириш борасида тизимли ишлар амалга оширилаяпти. Бунда Ўзбекистон Республикаси Президентининг 2017 йил 1 апрелдаги “Соғлиқни сақлаш соҳасида хусусий секторни янада ривожлантириш чора-тадбирлари тўғрисида”ги қарори муҳим дастуриламал бўлмоқда.

Айни пайтда вилоятимизда хусусий тиббиёт муассасалари томонидан рухсат этилган ихтисосликлар бўйича аҳолига малакали ва сифатли тиббий хизматлар кўрсатилмоқда.

Мазкур замонавий клиникада 6 та йўналишда аҳолига тиббий хизмат кўрсатиш йўлга қўйилди. 20 нафар тиббиёт ходими меҳнат қилаётган муассасада хориждан энг замонавий жиҳозлар келтирилган.

– Клиникамизга малакали мутахассислар жалб этилган, – дейди “Grand-Farm Avitsenna” ва “Grand-Medical cen­ter” масъулияти чекланган жамияти директори Ғолиб Каримов. – Айниқса, хорижлик мутахассислар ҳамда пойтахтимиздаги малакали шифокорлар ўртасидаги доимий ҳамкорлик алоқаларининг ўрнатилгани аҳоли саломатлиги йўлида муҳим омил бўлмоқда. Мамлакатимизда хусусий тиббиёт муассасаларига яратилган им­тиёзлар­дан фойдаланиб, ноль фоиз ставкаси билан 3 йил муддатга 120 минг АҚШ доллари кредити эвазига хориждан энг сўнгги русумдаги тиббий жиҳозларни харид қилдик. Айни пайтда республикамизнинг марказий тиббиёт муассасалари шифокорлари аҳолини тиббий кўрикка жалб этиб, зарур муолажалар кўрсатмоқда. Яқин кунларда Ҳиндистоннинг Аполло клиникаси шифокорларини марказимизга таклиф этиб, аҳолини малакали кўрикдан ўтказиш баробарида, маҳаллий мутахассислар билан маҳорат дарслари ўтказиш режалаштирилмоқда.  Муассасамизда махсус фитобар ҳам ташкил этилган.

Эндиликда, клиникани замонавий тиббиёт жиҳозлари билан таъминлаш, тиббий хизмат сифати ва турини кенгайтириш борасида тизимли ишлар амалга оширилмоқда. Хусусан, клиникада оператив бўлим ташкил этиш, пировардида қўшимча 15 янги иш ўрни яратиш борасида изланишлар бошланган.

– Янги шифохонага келиб, касаллигим бўйича қимматли маслаҳатларни олдим, – дейди Зарафшон шаҳрида яшовчи Чаман Хайруллаева. – Етти йилдан бери қон босими безовта қилиб келарди. Пойтахтдан келган малакали кордиолог шифокор кўрикдан ўтказиб, шифо топишим учун керакли муолажаларни олишимни тавсия қилди. Маслаҳатлари менга жуда маъқул, айниқса, клиникадаги шароитлар жуда қулай.

Президентимизнинг юқорида номи қайд этилган қарорида хусусий тиббиёт муассасалари фаолиятининг ҳуқуқий ва амалий механизмларини янада такомиллаштириш, сифатли тиббий хизмат кўрсатиш учун зарур шароитлар яратиш, тармоқнинг барқарор ривожланишига тўсқинлик қилаётган масалаларни тизимли ҳал этиш чора-тадбирлари белгиланган.

Хусусан, хусусий тиббиёт муассасалари 2022 йилнинг 1 январига қадар барча турдаги солиқлар ва мажбурий ажратмалар тўлашдан озод этилгани катта имтиёздир. Шу пайтгача хусусий тиббиёт муассасаларига 177 турдаги тиббий хизматнинг 50 тасига рухсат берилган эди. Қарорга биноан энди хусусий шифо муассасаларига тиббий хизматларнинг деярли барча турларини кўрсатишга рухсат берилди. Бу имконият аҳоли, айниқса, чекка ҳудудлардан шифо излаб келган беморлар учун ҳам қулайлик яратади.

Нуриддин РАҲИМОВ.

Суратлар муаллифи

Сирож АСЛОНОВ.

Подробности

Категория: Jamiyatdagi

Просмотров: 699

Олий Мажлис Сенатининг ўн тўртинчи ялпи мажлисида маъқулланган “Ўзбекистон Республикаси уй-жой коммунал хизмат кўрсатиш соҳаси ходимлари кунини белгилаш тўғрисида”ги қонунга кўра 18 апрель – Уй-жой коммунал хизмат кўрсатиш соҳаси ходимлари куни сифатида белгиланган эди.

Мамлакатимизда бу соҳада кенг кўламли ислоҳотлар амалга оширилмоқда. Хусусан, уй-жой коммунал хизматлар кўрсатиш, кўп хонадонли уй-жой фондидан фойдаланиш, шунингдек хусусий уй-жой мулкдорлари ширкатларининг молиявий-иқтисодий барқарорлигини ошириш бўйича самарали ва сифатли янги тизим шакллантирилди.

Бугунги кунда Кармана тумани Уй-жой коммунал хизмат кўрсатиш бўлимида томонидан ҳам ҳудудда жойлашган кўп қаватли уй-жойларнинг техник ҳолатини мониторинг қилиш, уларга туташ ҳудудларни ободонлаштириш, ичимлик суви, табиий газ ва электр энергияси таъминоти ҳамда бошқа коммунал хизматларнинг сифатини яхшилаш борасида эътирофли ишлар амалга оширилмоқда.

— Туман ҳокимлиги билан ҳамкорликда “Сардоба” маҳалла фуқаролар йиғини ҳудудида жойлашган 26 та кўп қаватли уйларнинг кириш йўлаклари мукаммал таъмирдан чиқарилди, — дейди бўлим бошлиғи Мақсуд Эгамов. — Яроқсиз ҳолга келиб қолган дераза ромлари замонавийсига алмаштирилди. Ушбу ишларни амалга ошириш учун 18 миллион сўмдан ортиқ маблағ сарфланди. Бундан ташқари, ушбу маҳалладаги 7 та кўп қаватли уйнинг том қисми 100 миллион 700 минг сўмга профностиль қопламаси билан таъмирланди. Бу каби чора-тадбирлар куз-қиш пайтида юзага келиши мумкин бўлган муаммоларнинг олдини олишда муҳимдир.

Бўлим томонидан жорий йил сўнгига қадар яна 7 та уйнинг том қисмини мукаммал, 34 уйнинг том қисмини жорий таъмирлаш, 69 та уйда жами 81 та кириш йўлакларига темир эшиклар, чироқлар ўрнатиш ва бошқа шу каби ишларни бажариш кўзда тутилган.

Соҳа ходимлари туманимиздаги маҳаллаларда бўлиб, уй-жойлар атрофини ободонлаштириш, кўкаламзорлаштириш, энг муҳими инсонларда  “Шу уй меники, унинг тоза-озодалигига мен жавобгарман” деган туйғуни шакллантириш юзасидан учрашувлар ҳам ўтказмоқда. 

Ўз хизматлари билан фуқаролар яшаш шароитларини яхшилашга ҳисса қўшаётган соҳа ходимларини касб байрамлари билан муборакбод этамиз.

Темур БАЙБИКОВ.

24.04.2018

Подробности

Категория: Jamiyatdagi

Просмотров: 722

ЭСДАЛИК НИШОНЛАРИ ТОПШИРИЛДИ.

Вилоят ва Кармана туман ҳокимлигида Ўзбекистон Рес­публикаси Президентининг 2017 йил 10 октябрдаги Фармони билан таъсис этилган “Ўзбекистон Конституциясига 25 йил” эсдалик нишонини топшириш маросими бўлиб ўтди.

Тантанали тадбирда Ўзбекистон Республикасининг Конституцияси мукаммал қомуслардан бири бўлиб, ҳуқуқий демократик давлат ва кучли фуқаролик жамияти барпо этиш, халқимизнинг тинч ва фаровон ҳаётини таъминлаш, мамлакатимизнинг халқаро майдондаги нуфузини юксалтиришда муҳим ҳуқуқий ҳужжат эканлиги таъкидланди. Асосий қонунимизда Ўзбекистоннинг ўз танлаган йўли, фуқароларнинг манфаатлари, ҳуқуқ ва бурчлари алоҳида инобатга олинган.

Мамлакатимизда амалга оширилаётган барча ислоҳотлар замирида Бош қомусимизда белгиланган қоида ва тамойиллар, реал ва ҳаётий принциплар мужассамдир. Конституциямиз юртимизда ҳуқуқий демократик давлат, кучли фуқаролик жамияти, эркин бозор муносабатлари ва хусусий мулк устуворлигига асосланган иқтисодиётни қуриш, халқимиз учун тинч, обод ва фаровон ҳаёт барпо этиш Ўзбекистоннинг халқаро майдонда муносиб ўрин эгаллашида мустаҳкам пойдевор бўлиб хизмат қилмоқда.

Бош қомусимиз Инсон ҳуқуқлари умумжаҳон декларацияси ва бошқа асосий халқаро ҳужжатлар талабларига тўла мос ҳолда, инсон ва фуқароларнинг шахсий ҳуқуқ ва эркинликлари, сиёсий, иқтисодий ва ижтимоий ҳуқуқларини кафолатлаб берди. Инсоннинг маънавий камол топиши ва ҳар томонлама уйғун ривожланиши учун зарур шарт-шароитлар яратди.

2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегияси ҳам Конституциямиз тамойилларига асосланган бўлиб, ҳар бир йўналиш аниқ вазифалар асосида иш олиб боришни талаб этади.

Президентимиз Шавкат Мирзиёевнинг 2017 йил 20 июндаги “Ўзбекистон Республикаси Конституцияси қабул қилинганининг йигирма беш йиллигини нишонлашга тайёргарлик кўриш ва уни ўтказиш чора-тадбирлари тўғрисида”ги фармойишига кўра, бу йил юртимизда Бош Қомусимиз қабул қилинганининг 25 йиллиги кенг нишонланмоқда.

Айниқса, давлатимиз раҳбари 2017 йил 10 октябрда “Ўзбекистон Конституциясига 25 йил” эсдалик нишонини таъсис этиш тўғрисида”ги фармонга имзо чеккани, мамлакатимиз мустақиллигини мустаҳкамлаш, унинг иқтисодий, сиёсий, ижтимоий, илмий, маънавий салоҳиятини ва мудофаа қудратини юксалтириш, демократик ислоҳотларни чуқурлаштириш, сарҳадларимиз дахлсизлигини таъминлаш, жамиятимизда ҳукм сураётган тинчлик ва барқарорликни, миллатлараро дўстлик ва тотувликни асраб-авайлаш, асосий қонунимизнинг ҳаётимиздаги ўрни ва аҳамиятини кенг тарғиб этиш, ёш авлодни қонунга ҳурмат, Ватанга муҳаббат ва садоқат руҳида тарбиялаш ишларига муносиб ҳисса қўшиб келаётган юртдошларимизни тақдирлашда муҳим омил бўлди.

Хусусан, вилоятимиздан 800 нафардан ортиқ, туманимиздан эса 67 нафар юртдошимиз “Ўзбекистон Конституциясига 25 йил” эсдалик нишони билан тақдирлангани улар қалбига беқиёс мамнунлик улашди.

Маросимда Ўзбекистон Республикаси Президенти номидан вилоят ҳокими Қ.Турсунов ушбу эсдалик нишонларини туман ва шаҳар ҳокимлари, вилоятдаги бошқарма ва идоралар, жамоат ташкилотлари раҳбарлари, маҳаллий Кенгашлар депутатлари, фахрийлар ва ёшларга тантанали равишда топширди.

Мукофотланганлар юксак эътибор ва эътироф учун миннатдорлик билдириб, бу мукофот юртимиз тараққиёти ва халқимиз фаровонлиги йўлида астойдил меҳнат қилиш учун муносиб рағбат эканлигини таъкидлади.

– Байрам шукуҳи кезиб юрган шу кунларда мазкур эсдалик нишони менга кутилмаган мукофот бўлди, – дейди Кармана туманидаги 2-умумий ўрта таълим мактаби директори Т.Халилова.  – Ёш авлодни комил инсон этиб тарбиялаш, конституциявий ҳуқуқларидан тўлақонли фойдалана олиши учун ҳуқуқий маданиятини юксалтириш, энг муҳими Ватан олдидаги бурчини адо этишида бор билим ва тарбиямни беришга тайёрман.

Бошқа туманларда ҳам эсдалик нишонларини тантанали топшириш маросимлари ўтказилди.

Нуриддин РАҲИМОВ.

Суратлар муаллифи

Сирож АСЛОНОВ.

11.12.2017