- Подробности
- Категория: Jamiyatdagi
- Просмотров: 560
Асал ўнлаб касалликларга даво бўлгувчи қимматбаҳо маҳсулот саналади. Уни етиштириш эса ўта нозик ва эътибор талаб этадиган соҳадир. Мамлакатимизда ушбу маҳсулотга бўлган эҳтиёжни қондириш ва тармоқда замонавий технологиялардан кенг фойдаланиш мақсадида кейинги йилларда қатор лойиҳалар амалга оширилди.
Хусусан, давлатимиз раҳбарининг 2017 йил 16 октябрдаги “Республикамизда асаларичилик тармоғини янада ривожлантириш чора-тадбирлари тўғрисида”ги қарори соҳани бошқариш тизимини тубдан такомиллаштириш, унда наслчилик ишларини илмий асосда ташкил этиш, асаларичилик хўжаликлари фаолияти самарадорлигини ошириш, асал маҳсулотлари ишлаб чиқариш ҳажми ва турларини янада кўпайтириш, уни қайта ишлаш, соҳанинг экспорт салоҳиятини ошириш, шунингдек, илғор тажрибаларни татбиқ этишга замин яратди.
Айни кунда республикамизда 2 мингдан ортиқ асаларичилик ташкилотлари фаолият олиб боради. Яқин келажакда уларнинг сони янада ошиб, асал етиштириш миқдорини жорий йилда 17 минг, 2021 йилда эса 23,7 минг тоннага етказиш мўлжалланган. Жумладан, вилоятимизда 2018 йилда маҳсулот ҳажмини 51 тоннага, ўтган йилга нисбатан ўсишни 120 фоизга таъминлаш кўзда тутилмоқда. Ҳосилнинг 48 тоннаси деҳқон ва шахсий ёрдамчи хўжаликлар томонидан тайёрланади. Бунга ҳамкорликда иш олиб бориш, асаларилар учун сунъий озуқалар ишлаб чиқаришни ташкил этиб, хўжаликлар захира базасини мустаҳкамлаш, касалликларнинг олдини олиш, даволаш ва ташхис қўйиш бўйича замонавий усулларни жорий этиш орқали эришиш мумкин.
Яна шуни таъкидлаш лозимки, қонунчиликка асосан энди асаларичилик хўжаликлари — “Ўзбекистон асаларичилари” уюшмаси аъзоларига асалари оилаларини асал йиғиш мавсуми давомида ўрмон фонди ерлари, муҳофаза этиладиган табиий ҳудудлар, тоғ ва тоғолди ҳудудлари, табиий пичанзор ва яйловлар ҳамда қишлоқ хўжалиги ерлари фойдаланишга бепул берилади. Бу ҳам соҳани ривожлантиришда муҳим омилдир.
АТ “Алоқабанк” таркибидаги лизинг компаниялари асалари уялари, зарур жиҳозлар ва ускуналар, инвентарлар, махсус транспорт воситалари ва тиркамалар, шунингдек, асални қадоқлаш бўйича замонавий технологик линияларни лизинг асосида тўлиқ етказиб беришга ҳаракат қилмоқда.
— Яратилган имконият ва имтиёзлардан фойдаланиб, етиштирилаётган маҳсулот ҳажмини йилдан-йилга ошириш бўйича қатор тадбирлар белгиланган, — дейди вилоят асаларичилар ассоциацияси раиси У. Муродов. — Айни кунда ҳудудда мазкур йўналишда 1070 нафар юртдошимиз фаолият олиб бораяпти. Улар 44 ярим минг оила асаларини парваришламоқда. Ҳозиргача уларнинг ярмиси жорий йил дастлабки ҳосилини олди. Ҳосилдорлик ҳар бир оила ҳисобига ўртача 4-5 килограммни ташкил этаётир. Йиғим ниҳоясига етса, нафақат ички эҳтиёжни қоплаймиз, балки маҳсулотнинг бир қисмини экспорт қилишга ҳам имкон туғилади. Яқинда Украина давлатининг Закарпатье вилоятидан 600 дона “Карпат” зотли она болари олиб келинди. У юқори ҳосилдорлиги, турли касалликларга чидамлилиги билан ажралиб туради. Шу билан бирга у қишда кам озуқа жамғармаси билан яшай олади ва эрта баҳорда ўзини қисқа фурсатда тиклайди. Яқин келажакда икки мингга яқин кўп тармоқли фермер хўжаликлари фаолиятида мазкур сердаромад соҳа билан шуғулланишни йўлга қўйиш ва фақатгина улардаги боларилар оиласи сонини 9775 тага етказиш бўйича ишлар жадал давом этмоқда. Жорий йилда, шунингдек, хўжаликларга 1615 та асалари оиласи етказиб берилади. Қизилтепа туманида маҳсулотни қайта ишлаш корхонаси бунёд этилади. Бу ва бошқа қатор лойиҳалар ижроси учун 1 миллиард 200 миллион сўм инвестиция маблағи йўналтирилади.
Ҳукуматимиз томонидан ушбу соҳа ривожига қаратилаётган юксак эътибор натижасида тармоқда ҳам тажриба мактаби яратилаяпти. Шубҳасиз, бу даргоҳ мураббийларининг ўгити юртимиз тараққиёти, халқимиз фаровонлиги йўлида беминнат хизмат қилади.
Олим ЖАЛИЛОВ,
“Дўстлик байроғи” мухбири.
20.07.2018
- Подробности
- Категория: Jamiyatdagi
- Просмотров: 477
Навоий вилоят ҳокими ўринбосари Ў. Исламов хорижий инвестицияларни воҳамиз ҳудудига жалб қилиш, чет эл ишбилармонларини ҳамкорликда қўшма корхоналар ташкил этиш, сайёҳлик имкониятларини кенгайтириш мақсадида Будапешт шаҳрида ўтказилган бизнес форумда иштирок этди.
Форум доирасида юртимиз делегацияси вакиллари ҳамда “WizzAir” авиакомпанияси президенти Ж. Варади билан учрашув ташкил этилиб, унда хорижлик ишбилармонга “Навоий” халқаро аэропортининг имкониятлари, Навоий-Будапешт-Навоий авиақатновларини йўлга қўйиш имкониятлари муҳокама қилинди.
Шунингдек, Венгрия миллий савдо уйида ҳам юртимиз ҳамда чет эл тадбиркорлик субъектлари вакиллари томонидан музокаралар олиб борилди. Натижада вилоятимизда фаолият олиб бораётган “Sharq yog'-moy sanoat” МЧЖ ҳамда “Virgin Oil Press” Ltd корхоналари ўртасида ҳамкорлик шартномаси имзоланди. 1 миллион долларлик мазкур шартномага кўра замонавий шарт-шароитлар асосида воҳамизда ёғмой ишлаб чиқариш корхонаси барпо этилади.
Бундан ташқари, Венгрияда мевачева савдоси борасида етакчи корхоналардан бири бўлган “Mirelite Mirsa” компанияси томонидан Хатирчи туманида 30 миллион долларлик лойиҳа амалга оширишга келишилди.
Делегация аъзолари, шунингдек, Веспремский вилоятида бўлиб, “Fonix” иқтисодий зонаси ҳамда “Навоий” эркин иқтисодий зоналари ўртасида ҳамкорлик ўрнатиш масалаларини муҳокама қилишди.
Ташриф натижаларига кўра, жами 1,5 миллион евро қийматидаги ҳамкорлик шартномалари имзоланди.
Ўз мухбиримиз.
20.07.2018
- Подробности
- Категория: Jamiyatdagi
- Просмотров: 476
Халқ таълими муассасалари ўқувчилари ўртасида ўтказиладиган “Яшил чироқ” республика мусобақасининг туман ва вилоят босқичлари ҳар томонлама пухта ҳозирлик билан ташкил этилди.
Шуниси эътиборлики, унда мактабимизнинг “Ёш назоратчи” гуруҳи аъзолари фаол қатнашиб, тадбирнинг туман ва вилоят босқичида фахрли биринчи ўринни қўлга киритишган эди.
Жорий йил 28-29 июнь кунлари Хоразм вилоятининг Урганч шаҳрида тадбирнинг республика босқичи ҳар томонлама намунали тарзда ташкил этилди.
Унда мактабимиз вакиллари барча шартлар талабларини аъло даражада бажариб, фахрли биринчи ўринни эгалладилар.
Гуруҳ мураббийлари — Д. Латипова, Ю. Турсуноваларнинг топшириқ ва кўрсатмаларини тўла-тўкис бажарган Асилбек Раҳматуллаев, Диёрбек Раҳимов, Нилуфар Зиёдуллаева, Муниса Ҳусенова, Динора Норқувватова, Асадбек Баҳриддиновларнинг саъй-ҳаракатлари туфайли юзимиз ёруғ бўлди.
Ғолиб жамоа ташкилотчилар, мутасаддилар томонидан диплом ва сертификат билан тақдирланди.
Омад сизга, “Ёш назоратчи”лар!
Турдигул ОСТОНОВА,
9-умумий ўрта таълим
мактаби ўқитувчиси.
- Подробности
- Категория: Jamiyatdagi
- Просмотров: 545
Болалик — ёруғ таассуротлар, беғубор орзуумидлар, ҳаётни, дунёни янгидан англаш палласидир.
Ана шу даврда эшитган эртакларимиз, ёдлаган шеърларимиз, ўқиган китобларимиз бир умр онг-шууримиз, хотирамизга муҳрланиб қолади.
Касбим — ўқитувчи. Шунинг учун ҳам ҳар куни ўқувчиларим билан юзма-юз бўламан. Дарс машғулотларидан сўнг уларни “Охирги марта ўқиган китобингиз ҳақида гапиринг!” дея саволга тутаман.
Бадиий асар ўқишга қизиқадиган ўқувчилар кўпчиликни ташкил этиши қувончли ҳолат, албатта. Кўпгина ўқувчилар ўзбек ва жаҳон адабиёти асарлари ҳақида сўз юритишади. Ўзлари ҳавас қилган асар қаҳрамонларининг исмлари, уларнинг феъл-атвори, қийинчиликларни юксак билим, мустаҳкам ирода билан енгиб ўтганликлари ҳақида гапиришади.
Шундай пайтларда баъзи ўқувчилар жим қолишади. Ҳамма гап ана шу “баъзи” ўқувчиларда.
Тўғри, мен уларни бутунлай китоб ўқишмайди, демоқчи эмасман, барчаси қизиқишда ва интилишда.
Ёзги таътил ойлари давом этмоқда.
Ўғлим, қўшнимизнинг фарзандлари қандай китобларни мутолаа қилишаётгани эътиборимни тортди. Бу Ўзбекистон халқ ёзувчиси Худойберди Тўхтабоевнинг “Ширин қовунлар мамлакати” асари.
Мен уларга бу забардаст адибнинг “Сариқ девни миниб”, “Сариқ девнинг ўлими, “Мунгли кўзлар”, “Беш болали йигитча” ва бошқа асарлари ҳақида сўзлаб бердим.
Ҳозир улар Худойберди Тўхтабоев китобларини мутолаа қилишаяпти. Шу билан бирга улар маҳалла спорт мусобақаларида фаол қатнашаяптилар. Уй-рўзғор юмушларида ота-оналарига яқиндан ёрдам беришмоқда. Энг муҳими, улар олтин ёзнинг ҳар бир кунини китоб билан дўстлашиб ўтказаяптилар...
Фотима ТИЛЛАЕВА,
17-умумий ўрта таълим мактаби ўқитувчиси.
13.07.2018
- Подробности
- Категория: Jamiyatdagi
- Просмотров: 543
“Навоий” эркин иқтисодий зонасида ташқи иқтисодий фаолият қатнашчилари иштирокида оммавий ахборот воситалари вакиллари учун матбуот анжумани ташкил этилди. Унда Ўзбекистон Республикаси Давлат божхона қўмитаси ҳамда Савдо-саноат палатаси вилоят ҳудудий бошқармалари масъул ходимлари томонидан экспорт-импорт билан шуғулланувчи тадбиркорлар учун юртимизда яратилган енгиллик ҳамда қулайликлар ҳақида маълумот беришди.
Дарҳақиқат, ташқи иқтисодий фаолият соҳасидаги давлат хизматларининг шаффофлигини ва ошкоралигини, импорт-экспорт операциялари мутаносиблигини таъминлаш тадбиркорлик фаолиятини жадал ривожлантириш, инвестиция ва экспорт салоҳиятини ошириш, аҳолининг турмуш шароити ҳамда сифатини яхшилашнинг энг муҳим шартлари ҳисобланади. Шу мақсадда Президентимизнинг 2018 йил 12 апрелдаги “Ўзбекистон Республикаси давлат божхона хизмати органлари фаолиятини тубдан такомиллаштириш чора-тадбирлари тўғрисида”ги фармони қабул қилинди.
– Мазкур ҳуқуқий ҳужжат билан Ўзбекистон Республикаси божхона органларини ислоҳ қилишнинг 8 та асосий йўналиши белгилаб берилди, — дейди вилоят божхона бошқармаси бўлим бошлиғи О. Иброҳимов. – Уларни амалга ошириш юзасидан “Давлат божхона хизмати органлари фаолиятини такомиллаштириш юзасидан тадбирлар Дастури” тасдиқланди. Унга кўра, жорий йил 1 июлдан бошлаб ташқи иқтисодий фаолият қатнашувчилари учун қулайлик ва енгилликлар яратилди. Жумладан, товарларни божхона режимларига жойлаштириш ҳамда хорижий автоташувчиларнинг мамлакатимиз бўйлаб ҳаракатланиш маршрутларини ўзгартиришга божхона органлари томонидан бериладиган рухсатномалар бекор қилинди.
Шунингдек, айнан бир хил товарларнинг божхона расмийлаштируви ташқи савдо шартномаси доирасида даврий декларацияларни тақдим этиш йўли билан амалга оширилаяпти. Ташқи савдо шартномаси доирасида ўсимлик, ҳайвонот дунёси объектларини олиб кириш ва чиқиш, маҳсулотларга мувофиқлик, ветеринар, гигиеник ва экологик сертификатлар, карантин рухсатномалар бир йилдан ошмаган муддатга бир маротаба тақдим этилади.
Анжуманда сўз олганлар бож олинмайдиган савдо дўкони, эркин ва божхона омбори фаолиятини лицензиялаш, марказлаштирилган тартибда Ўзбекистон Республикаси Давлат божхона қўмитаси марказий аппарати томонидан амалга оширилади. Ташқи иқтисодий фаолият иштирокчилари божхона юк декларацияларини божхона брокерларига мурожаат қилмаган ҳолда, интернет тармоғи орқали реал вақт режимида тўлдириш ва божхона органларига тақдим этишга ҳақли эканлигини ҳам таъкидлашди.
Ўз навбатида, ушбу фармон билан қонунга риоя этмайдиган тадбиркорларга тегишли чоралар кўриш борасида божхона органлари ваколатлари ҳам белгилаб берилди. Мисол учун, божхона органлари импорт қилинаётган товарларнинг нархини ошириб кўрсатиш ҳолатлари бўйича мунтазам равишда мониторинг ўтказади. Божхона омборларида 3 йилдан ортиқ сақланиб келинаётган молмулклар уч ой давомида талаб этиб олинмаган тақдирда, суд қарори асосида давлат фойдасига мусодара қилинади.
Тадбиркорлик субъектлари томонидан тақдим этилган маълумотларнинг тўғрилиги ва уларнинг ташқи савдо фаолияти қонунийлигини текшириш мақсадида, товарлар ва транспорт воситалари эркин муомалага чиқарилгандан сўнг уларнинг божхона назоратини амалга оширади.
Фармоннинг 6-бандига мувофиқ, 2018 йил 1 сентябрга қадар товарларнинг божхона назоратини танлов асосида ўтказишни назарда тутувчи хавфни бошқариш автоматлаштирилган тизимини ишлаб чиқилиши ва амалиётга татбиқ этилиши белгиланди.
Тадбирда журналистлар ўзларини қизиқтирган саволларга атрофлича жавоб олдилар.
Нуриддин РАҲИМОВ
Сурат муаллифи
05.07.2018
