- Подробности
- Категория: Jamiyatdagi
- Просмотров: 508
Кармана тумани ҳокими Фахритдин Умаровнинг Ўзбекистон Республикаси давлат мустақиллигининг йигирма етти йиллиги муносабати билан туман аҳлига байрам ТАБРИГИ
Қадрли тумандошлар!
Бугун мамлакатимизнинг ҳар бир гўшасида бўлгани каби туманимизда ҳам Ўзбекистон Республикаси давлат мустақиллигининг йигирма етти йиллигини кўтаринки кайфият ва улкан ютуқлар билан қарши олмоқдамиз.
Айниқса, ушбу байрам “Азиз ва ягонамсан, жонажон Ўзбекистоним!” номли эзгу ғоя остида нишонланаётганлиги барчамизга юксак ғурур ва ифтихор бағишлайди, албатта.
Фурсатдан фойдаланиб, Сизларни энг улуғ, энг азиз айём — Истиқлолимизнинг қутлуғ йигирма етти йиллиги байрами билан чин қалбимдан самимий табриклайман.
Таъкидлаш жоизки, муҳтарам Президентимиз Шавкат Мирзиёевнинг жорий йил 28 июнда эълон қилинган “Ўзбекистон Республикаси давлат мустақиллигининг йигирма етти йиллик байрамига тайёргарлик кўриш ва уни ўтказиш тўғрисида”ги қарори бу йил ушбу муқаддас байрам янада кўтаринкилик ва юксак савияда нишонланишини ўзида ифода этганлиги билан ҳам аҳамиятлидир. Мазкур қарорда байрамни ўтказиш билан боғлиқ бир қатор устувор йўналишларнинг белгилаб берилганлиги, унинг мазмун-моҳияти йил сайин такомиллашиб, кўлами кенгайиб бораётганлигидан дарак беради.
“Жонажон Ватанимиз — Ўзбекистонимиз миллий тараққиётнинг янги босқичига қадам қўйиб, барча соҳа ва тармоқларда демократик янгиланиш жараёнлари амалга оширилаётган бугунги кунда биз учун бебаҳо неъмат бўлган мустақилликнинг қадрқиммати ва аҳамияти тобора ортиб бормоқда.
Ўтган давр биз учун ғоят муҳим бир ҳақиқатни такрор ва такрор тасдиқлаб бермоқда. Эркин ва фаровон ҳаётимизни, буюк келажагимизни фақат мустақиллик асосида қуришимиз, одамларимиз, эл-юртимизни фақат мустақил сиёсат асосида рози қилишимиз мумкин. Фақат мустақиллик бугунги ва келгуси авлодлар учун мисли кўрилмаган имкониятлар очиб беради.
Шу маънода, мамлакатимиз истиқлолини, у билан боғлиқ тарихий сана ва воқеа-ҳодисаларнинг моҳиятини чуқур англаш ва қадрлаш, ҳар томонлама муносиб нишонлаш ижтимоий-сиёсий ва маънавий ҳаётимизда алоҳида муҳим ўрин тутади”, дея таъкидлаб ўтилган Президентимиз қарорида.
Шубҳасиз, мустақиллик улуғ неъмат. Озод ва обод, тинч юртдагина юксалишлар, ривожланишлар бўлади, фуқаролар эртанги кунига ишониб яшашади.
Айтиш мумкинки, мамлакатимизда амалга оширилаётган улкан ислоҳотлар, фуқаролар турмуш фаровонлигини таъминлашга, янгича яшаш, янгича фикрлашга қаратилган саъй-ҳаракатлар ўз самарасини бермоқда. Айниқса, “Обод қишлоқ”, “Ёшлар – келажагимиз”, “Ҳар бир оила тадбиркор” давлат дастурларининг ижросини таъминлаш орқали туманимизда ҳам эътирофли ишлар бажарилди.
Жумладан, туманимиз марказидан анча олис бўлган Ҳазора ва Тошработ қишлоқларида “Обод қишлоқ” дастури доирасида улкан бунёдкорлик ва ободонлаштириш ишлари амалга оширилмоқда. Ҳозиргача электр энергияси, табиий газ ва ичимлик суви таъминотини яхшилаш, турар ва нотураржойларни таъмирлаш, йўлларни кенгайтириш борасида муайян ишлар бажарилди. Хусусан, ҳудудда 7 та мактаб, 4 та мактабгача таълим муассасаси, 2 та сунъий қопламали спорт майдончаси, 2 та болалар майдончаси, 1 та “Оталар чойхонаси” ҳамда 2 та ҳаммом қуриш ва таъмирлаш ишлари амалга оширилаётгани аҳолини хурсанд қилмоқда. Дастурга асосан кейинги йилларда бошқа ҳудудларимизда ҳам шу каби бунёдкорлик ишлари бажарилади.
Шунингдек, “Ҳар бир оила тадбиркор” дастури бўйича тижорат банклари томонидан оилаларга имтиёзли кредитлар ажратилаётганлиги фуқароларнинг бандлигини таъминлаш ҳамда уларнинг турмуш фаровонлигини юксалтиришда муҳим аҳамият касб этмоқда.
Дастур доирасида бугунги кунгача 1212 та хонадонга 10 миллиард 711 миллион сўмлик кредитлар ажратилди.
Президентимиз фармони билан тасдиқланган “Ёшлар – келажагимиз” Давлат дастури ҳақиқатан ҳам келажак ворислари ҳаётида янги бурилиш ясади, десак муболаға эмас. Мазкур дастур ижросини таъминлаш мақсадида тузилган ишчи гуруҳ аъзолари мамлакатимиздаги барча маҳаллаларда уйма-уй юриб, 14 ёшдан 30 ёшгача бўлган ёшлар билан юзма-юз суҳбатлашди, уларнинг орзулари, режалари билан танишди, муаммоларини ўрганди. Жараёнда туманимизнинг кўплаб ёшлари “Ёшлар – келажагимиз” Давлат дастури мазмун-моҳиятини англаб, шу асосда бизнесини бошлаш арафасида.
Яқиндагина туманимизнинг Шибзон маҳалласида дастур доирасида барпо этилганлигидан хабарингиз бор. Яқин кунларда туманимизда яна 4 та шу каби “Ёшлар меҳнат гузари” барпо этилади.
Бир сўз билан айтганда, ҳар учала дастурни ҳаётга тадбиқ этишдан кўзланган асосий мақсад аввало фидойи халқимизнинг қалбида эртанги кунга бўлган ишонч ҳиссини янада ошириш ва оилалар фаровонлигини таъминлашдир.
Азиз дўстлар!
Бугун туманимиз аҳли ҳам мамлакатимиз мустақиллигининг йигирма етти йиллик қутлуғ тўйини ўзларининг фидокорона меҳнатлари ортидан муносиб совғалар билан кутиб олмоқдалар. Байрам арафасида туманимизда 10 миллиард сўм қийматга эга бўлган объектларнинг ишга туширилиши юртимиз кундан кунга ободликка юз тутаётганлигининг, гўзал масканга айланаётганлигининг ҳаётий ифодаси, десак ҳақиқатни айтган бўламиз.
Эришилаётган бундай ютуқлар замирида ўзини эл ривожига, жамият тараққиётига бағишлаган фидойи ва заҳматкаш юртдошларимизнинг муносиб меҳнати борлигини барчамиз яхши биламиз. Уларнинг фидокорона меҳнатлари ҳамиша муносиб тақдирланиб келган.
Азиз тумандошлар!
Фурсатдан фойдаланиб, Сизларни яна бир бор Мустақиллигимизнинг йигирма етти йиллиги билан табриклайман!
Озод ва обод Ватанимиз осмони ҳамиша мусаффо бўлсин, юртимиздан тинчлик-хотиржамлик, қутбарака ва фаровонлик ҳеч қачон аримасин.
- Подробности
- Категория: Jamiyatdagi
- Просмотров: 560
Ўзбекистон Республикаси Президентининг 2018 йил 27 июндаги “Ўзбекистон Республикасида оила институтини мустаҳкамлаш концепциясини тасдиқлаш тўғрисида”ги ПҚ-3808-сонли қарори ижроси зиммамизга улкан масъулият юклайди.
Бугунги кунда юртимизда оилани ривожлантиришга алоҳида эътибор қаратилмоқда. Шу билан бирга, ушбу соҳада давлат сиёсатини муваффақиятли олиб бориш, оила институтини такомиллаштириш бўйича комплекс чора-тадбиларни амалга ошириш, бу жараёнга давлат органлари, фуқаролик жамиятлари институтлари ва фуқароларнинг яқин ҳамкорлигини таъминлаш мақсадида мазкур қарор билан “Ўзбекистон Республикасида оила институтини мустаҳкамлаш концепцияси”, концепцияни амалга ошириш бўйича “Йўл харитаси” тасдиқланди.
Давлат ижтимоий сиёсатининг таркибий қисми ҳисобланган оила сиёсати аҳоли бандлигини ва реал даромадларини изчил ошириб боришга, фуқаролар фаровонлигини янада юксалтиришга, ижтимоий муҳофаза қилиш ва соғлиқни сақлаш тизимини такомиллаштиришга қаратилган.
Мазкур Концепция давлат органларининг, фуқаролик жамияти институтларининг ўзаро ҳамкорлиги, қабул қилинаётган норматив-ҳуқуқий ҳужжатлар ва давлат дастурларини сўзсиз амалга ошириш, оила институтини мустаҳкамлаш соҳасидаги муаммоларни ўз вақтида аниқлаш ва самарали ҳал этишга хизмат қилади. Шу муносабат билан Концепцияни муваффақиятли амалга ошириш орқали, биринчи навбатда “Фаровон оила – жамият равнақининг асоси” концептуал ғояни ҳаётга тадбиқ этишга қаратилган янги оила моделини шакллантиришда қуйидаги устувор вазифалар ва асосий йўналишлар назарда тутилмоқда:
- оила институтини мустаҳкамлашнинг институционал ва ҳуқуқий асосларини такомиллаштириш, ижтимоий шерикликни кучайтириш, бунда оилани мустаҳкамлаш ва ривожлантириш масалалари бўйича идоралараро ҳамкорликни ҳамда давлат, фуқаролик жамияти институтлари ва хусусий секторнинг ўзаро ҳамкорлигини ривожлантириш;
- замонавий оилани мустаҳкамлаш ва ривожлантириш масалалари бўйича фундаментал, амалий ва инновацион тадқиқотлар олиб бориш, хусусан, анъанавий оилавий қадриятларни сақлаб қолган ҳолда замонавий оила моделини шакллантириш учун тарихий-маданий шарт-шароитларни комплекс тадқиқ этиш, уларни кенг тарғиб қилиш ва ҳаётга жорий этиш бўйича илмий асосланган таклифларни ишлаб чиқиш. Ҳуқуқбузарликлар, жиноятчилик, оиладаги можаро ва зўравонликлар, оилалар ажралиши ҳамда улар ижтимоий оқибатларининг олдини олиш бўйича чора-тадбирлар ишлаб чиқиш.
- демографик ривожланишни рағбатлантириш ва оила фаровонлиги даражасини ошириш, жумладан, оиланинг репродуктив саломатлигига ва демографик ривожланишига доир масалаларни, оилаларнинг фаровонлик ва хотиржамлик даражасини комплекс тадқиқ этиш ҳамда муаммоларни омилли асосда таҳлил қилиш;
- оиланинг тарбиявий-таълим салоҳиятини мустаҳкамлаш, жамиятда анъанавий оилавий қадриятларни сақлаш, оилаларда маънавий-ахлоқий муҳитни яхшилаш ҳамда ўсмирлар, ёшлар, ёш ота-оналар билан уларнинг билим даражасини ошириш ва ибратли ота-оналик кўникмаларини шакллантириш бўйича ишларнинг самарадорлигини ошириш;
- оилаларга таъсирчан методик, консультатив ва амалий ёрдам кўрсатишнинг самарали тизимини яратиш, шу жумладан, оилалар билан ишлайдиган мутахассислар учун оилаларга таъсирчан услубий, консультатив ва амалий ёрдам кўрсатиш мақсадида профессионал супервизия тизимини ишлаб чиқиш.
Концепция ва “Йўл харитаси”ни амалга ошириш жараёнининг самарали мувофиқлаштирилиши ҳамда тизимли мониторинги, уларнинг ижроси “Оила” илмий-амалий тадқиқот маркази томонидан амалга оширилади.
Жамият асоси бўлган оилани давр талаблари даражасида юксалтириш учун самарали ишлар аллақачон бошлаб юборилган.
Г. ДЖАЛИЛОВА,
“Оила” илмий-амалий
тадқиқот маркази
туман бўлими раҳбари.
18.08.2018
- Подробности
- Категория: Jamiyatdagi
- Просмотров: 533
Байрамлар олдидан кўчаю хиёбонлар, ҳовли ва ариқларни тозалаб, тартибга келтириш, қабристонлар ва муқаддас қадамжоларни обод этиш халқимизга хос эзгу фазилатлардан, миллий қадриятларимиздан бири ҳисобланади.
Туманимиз ҳудудида 18-19 август кунлари ўтказилган умумхалқ ҳашари тадбирларида қарийб 87 минг нафар аҳоли иштирок этди.
Тадбирларда ҳудудларни ободонлаштириш ва аҳолининг ижтимоий ҳимояга муҳтож қатламларига беминнат мурувват ёрдамлари кўрсатишда кенг кўламли ишлар амалга оширилди. Ушбу жараёнларда 33 минг нафардан ортиқ ёшларнинг қатнашгани, ёш авлоднинг азалий қадриятларимизга нечоғли ҳурмат руҳида тарбияланаётганини ифода этди.
Ҳашар давомида жами 308 гектар майдон ободонлаштирилиб, 87 километр ариқ ва лотоклар тозаланди. Қабристонлар ободлигига алоҳида эътибор қаратилиб, жами 45 та манзил бўйича тозалаш ишлари олиб борилди.
Шунингдек, шу куни 62528 та дарахт оқланиб, шакл берилди. Бу ишларга 92 та техника воситалари жалб этилди.
— Хайрия ҳашарида 45 нафар кам таъминланган оилаларнинг уй-жойлари 15 миллион сўмдан ортиқ маблағлар эвазига бепул таъмирланди. Моддий ёрдамга муҳтож 131 нафар оилага ёрдам кўрсатилди. Умуман олганда, тумандошларимиз мустақиллигимизнинг йигирма етти йиллигини муносиб кутиб олиш, ҳудудларни, хонадонларни ободонлаштириш, кўркам ва файзли масканларга айлантириш борасида фаоллик кўрсатишмоқда, — дейди туман “Маҳаллалар кенгаши” раисининг биринчи ўринбосари Дилмурод Холов.
Бир сўз билан айтганда, халқимизнинг азалий қадрияти бўлган ҳашар одамларимизнинг жипслиги, бирдамлигини амалда исботлаб берди. Кўнгиллардаги ободлик кўчаларга, хонадонларга кўчди.
О. ШУКУРОВ.
Суратлар муаллифи Сирож АСЛОНОВ.
18.08.2018
- Подробности
- Категория: Jamiyatdagi
- Просмотров: 572
“Yoshlar- kelajagimiz” давлат дастури мамлакатимизда ёш ишбилармонларни қўллаб-қувватлаш, уюшмаган ёшларни иш билан таъминлаш, навқирон авлод муаммоларини тизимли ҳал этишда муҳим асос бўлиб хизмат қилмоқда.
Вилоят ҳокими Қ. Турсунов “Ишонч” оромгоҳида бир гуруҳ туманимиз ёшлари билан учрашиб, уларнинг муаммоларини тинглади. Тадбирда, шунингдек, вилоят марказий банки бошқармаси раиси Р. Сулаймонов, Ўзбекистон ёшлар иттифоқи вилоят Кенгаши раиси Ж. Ходжаев ҳамда тегишли ташкилот ва муассасалар масъуллари иштирок этди.
Вилоят ҳокими ёшларни иш билан таъминлаш, уларга бизнес юритиши учун ҳудудга ажратилган 22 миллиард сўмнинг 3 миллиард 700 миллион сўми туман ёшлари учун йўналтирилгани катта имконият эканлигини таъкидлади. Чорвачилик, паррандачилик, асаларичилик, тикувчилик, қуёнчилик каби йўналишларда тадбиркорлик фаолиятини йўлга қўймоқчи бўлган ёшлар учун имтиёзли кредит берилиши, ундан мақсадли фойдаланиш зарурлиги қайд этилди.
Шундан сўнг ёшларнинг турли мавзулардаги муаммо ва таклифлари тингланди. Жумладан, Навоий кончилик коллежи ўқувчиси С. Сирожов қандолатчилик маҳсулотлари ишлаб чиқаришни ташкил этиш учун жой сўраб мурожаат қилган бўлса, “Наврўз” маҳалласидан Р. Рўзиев ҳовлиси ёнидаги икки сотих қаровсиз ерни олишда, “Бешкент” МФЙдан Н. Мадалиев тикув цехи, гўзаллик салони очишда кредит ажратишда амалий ёрдам сўрашди. Бундан ташқари С. Ҳамидовнинг мих ишлаб чиқаришни йўлга қўйиш ҳақидаги фикрига бу бизнинг ҳудудда ўзини оқламаслиги, бошқа тадбиркорлик фаолияти билан шуғулланиши мумкинлиги айтилди.
Учрашувда ёшлар ва аҳоли томонидан билдирилган бошқа масалалар бўйича ҳам масъул вакилларга топшириқлар берилди.
— Бир неча йилдан буён тикувчилик билан шуғулланаман, — дейди “Зиёкор” маҳалласида истиқомат қилувчи С. Файзиева. — Уйда уч нафар шогирдим билан ишлардик. Алоҳида тикув цехи ташкил қилиш, бу учун жой беришларини сўраб мурожаат қилгандим. Маҳалламиздан уйимга яқин бўлган бўш бинодан хона ажратилиши менга яна куч берди. Ҳокимнинг ўзлари биз билан кўришиб, муаммоларимизни эшитгани, қўллаб-қувватлашга тайёрлигидан хурсанд бўлдим.
Учрашувда шунингдек, тикувчилик йўналишида ишлаш истагини билдирган хотин-қизларга имтиёзли кредит асосида ажратилган қирқта “Baoyu” русумидаги электр тикув машинаси сертификати топширилди.
Учрашув йиғилганларда катта таассурот қолдирди.
Зулфия БОБОЕВА,
журналист.
- Подробности
- Категория: Jamiyatdagi
- Просмотров: 469
Мамлакатимизда фарзанд тарбиясига бўлган эътибор давлат сиёсати даражасига кўтарилиб, бу борадаги ўзгаришлар келажагимиз ворисларининг юрт равнақига муносиб ҳисса қўшишлари баробарида асрларга татигулик воқеликлар сари етаклаши шубҳасиздир, албатта.
Ёш авлодни миллий истиқлол ғояларига, она-Ватанга муҳаббат руҳида тарбиялаш ҳозирги куннинг энг муҳим масалаларидан биридир. Шу сабабдан юртимизда келажак авлод таълим-тарбиясига қаратилган эътибор эндиликда мактабгача тарбия муассасаларига ҳам дахл этиб, комил инсон зийнатлари пойдеворини мазкур даргоҳлардаёқ мустаҳкамлаб бориш, камол топтиришни мақсад тутганлиги билан аҳамиятли.
Жорий йилнинг 10 август куни туманимиздаги “Юлдузча” номли 17-МТМ-да “Болаларга эътибор — келажакка пойдевор” мавзусида амалий ўқувсеминари ўтказилди. Унда иштирок этган педагог-тарбиячилар мазкур таълим муассасасида амалга оширилаётган тизимли ишлар ҳамда қўл меҳнати орқали яратилган кўргазмалар билан танишиб, ўзаро фикр алмашдилар.
Шунингдек, семинар доирасида иштирокчилар бевосита муассаса ошхонасида, таомномага киритилган маҳсулотлар сифати, яроқлилик муддати, уларни сақлаш учун яратилган шароитлар билан ҳам танишдилар.
Бугунги кунда ушбу таълим муассасасида 140 нафар бола тарбияланмоқда. Мактабга тайёрлаш гуруҳларига алоҳида эътибор қаратилиб, кун тартиби аниқ ва тўғри йўналтирилган.
— Таълим-тарбия қанча эрта бошланса, унинг самараси шунчалик эрта намоён бўлиб, инсоннинг бутун ҳаёт тарзига ижобий таъсир кўрсатади. Бинобарин, мактабгача таълим муассасаларида тўғри овқатланишни ташкил этиш ҳам ушбу таълимнинг ажралмас ҳамда бола шахсини баркамол ва соғлом вояга етказиш кафолати ҳисобланади, Муассасамизда машғулотларнинг самарали ташкил этилиши, кундузги уйқу, сайр ва тўғри овқатланишнинг етарли даражада яхши йўлга қўйилишига катта эътибор қаратиб келмоқдамиз, — дейди мудира Хосият Нурматова.
Фарзандлар келажагини ўйлаш, аждодлар руҳи, авлодлар истиқболи олдида масъулият ҳисси билан яшаш халқимизга хос фазилат. Мактабгача таълим даври эса бола шахси шаклланишининг асосий босқичи ҳисобланар экан, у жойдаги ҳар бир ходим зиммасига авлод тарбиясининг энг муҳим бошланғич бўғини ишониб топширилган.
МТМ да ўтказилган ҳар бир машғулот бола қалбида атроф-муҳитга, ота-она, Ватанга бўлган муҳаббат туйғуларини тарбиялайди.
Шундай экан, ўқувсеминарида кун тартибига қўйилган долзарб вазифалар албатта ижро этилиши шарт ва зарур.
Мадина ЯКУБОВА.
17.08.2018
