Подробности

Категория: Iqtisodiyot

Просмотров: 430

Сир эмаски, ҳудудларни жадал ижтимоий-иқтисодий ривожлантиришни таъминлаш, тадбиркорлик фаолиятини амалга ошириш ва инвестициялар, шу жумладан, тўғридан-тўғри хорижий инвестицияларни жалб этиш учун максимал даражада қулай шарт-шароитлар яратиш борасида муайян муаммолар мавжуд.

Хусусан, янгидан ташкил этилган давлат органлари ва ташкилотлари раҳбарлари, инвестицияларни жалб этиш, иқтисодиёт ва тадбиркорликни, эркин иқтисодий ва кичик саноат зоналарини ҳамда туризмни ривожлантириш учун масъул бўлган ҳоким ўринбосарлари тадбиркорларнинг долзарб муаммоларини ҳал этишга, ҳудудларда ишбилармонлик муҳитини яхшилаш бўйича таклифлар ишлаб чиқишга ҳамда мавжуд салоҳиятдан максимал даражада фойдаланишга кўп ҳолларда бепарво муносабатда бўлмоқда.

Ўзбекистон Республикаси Президенти шуларни ҳисобга олган ҳолда, ҳудудларни ижтимоий-иқтисодий ривожлантиришга тадбиркорлик субъектларини кенг жалб этиш, тадбиркорлик ташаббуслари ва лойиҳаларининг ўз вақтида амалга оширилишини таъминлаш, шунингдек, бўш турган объектлар, ер участкалари ва бошқа инфратузилмадан самарали ва оқилона фойдаланиш мақсадида 2018 йил 11 сентябрда “Ҳудудларда тадбиркорлик ташаббуслари ва лойиҳаларини жадал амалга оширишни ташкил этиш чора-тадбирлари тўғрисида”ги ПҚ-3939-сонли  қарорига  имзо чекди. 

Қарорга мувофиқ, ҳудудларда тадбиркорликни қўллаб-қувватлаш ва ривожлантириш комиссияси ҳамда тадбиркорликни қўллаб-қувватлаш ва ривожлантириш бўйича ҳудудий гуруҳлар ташкил этилади. Ҳудудий гуруҳлар таркибига кирган давлат органлари ва ташкилотлари раҳбарлари ва ходимлари асосий иш жойи бўйича мажбуриятларини бажаришдан озод қилинади ҳамда доимий равишда ўзларига бириктирилган ҳудудда бўлади.

Комиссия 10 кунда камида бир марта жойлардаги давлат органлари ва ташкилотлари даражасида ҳал қилинмаган муаммоли масалаларни ўрганади ҳамда тадбиркорликни ривожлантиришга, тадбиркорлик ташаббуслари ва лойиҳаларини амалга оширишга тўсқинлик қилаётган мавжуд бюрократик тўсиқ ва ғовларни бартараф этиш чораларини кўради.

Тадбиркорликни ривожлантириш, тадбиркорлик ташаббуслари ва лойиҳаларини амалга ошириш бўйича қабул қилинган қарорлар, шу жумладан, давлат органлари ва ташкилотларига манзилли топшириқлар назарда тутилган қарорлар ижроси устидан тизимли назоратни амалга ошириш ҳам комиссиянинг вазифаси ҳисобланади.

Ҳудудий гуруҳларнинг асосий вазифалари этиб эса ҳудудларнинг ижтимоий-иқтисодий ривожланиши ҳолатини, шу жумладан, муҳандислик-коммуникация, ишлаб чиқариш ва бошқа инфратузилмани ўрганиш, шунингдек, уларни, шу жумладан, халқаро молия институтлари ва хорижий тижорат банклари маблағларини жалб этган ҳолда янада ривожлантириш ва такомиллаштириш бўйича таклифлар киритиш белгиланган.

Гуруҳлар ҳудудларнинг эҳтиёжи ва салоҳиятидан, шунингдек, ресурс, табиий-иқлим, меҳнат ва бошқалардан келиб чиқиб, инвестиция киритишни талаб этадиган истиқболли лойиҳаларни, шунингдек, бўш турган давлат мулки объектлари ва ер участкаларини ўрганади ва аниқлайди. Тадбиркорлик субъ­ектлари томонидан қўллаб-қувватланган ва тегишли ҳудудда амалга ошириш таклиф қилинаётган истиқболли лойиҳаларни тезкор кўриб чиқиш чораларини кўриб, салоҳиятли инвесторлар билан музокаралар ва учрашувлар ўтказади. Тадбиркорлик ташаббуслари ва лойиҳаларини, шу жумладан, халқаро молия институтлари ва хорижий тижорат банкларининг кредит линиялари ҳисобидан амалга оширишда тижорат банкларининг иштирокини таъминлайди. Бўш турган давлат мулки объектлари ва ер участкаларини аукцион савдоларига қўйиш билан боғлиқ масалаларнинг тезкорлик билан ҳал этилишини таъминлаш жойларда давлат органлари ва ташкилотлари даражасида ҳал қилинмаган тадбиркорлик фаолияти билан боғлиқ муаммоли масалаларни, шунингдек, зарур ҳолларда, истиқболли тадбиркорлик ташаббуслари ва лойиҳаларини амалга ошириш бўйича таклифларни Комиссияга киритиш ҳам  гуруҳ  зиммасига юкланган.

Рустам ТЕМИРОВ,

туман ҳокими ўринбосари.

Подробности

Категория: Iqtisodiyot

Просмотров: 595

ТАДБИРКОРЛИК НУФУЗИ ОШМОҚДА

Бугунги кунда юртимизда ишбилармонлик муҳитининг юксалаётгани боис, айни пайтда тадбиркорликни бошлаш, банкдан кредит олиш ҳар бир оилада энг кўп муҳокама қилинадиган мавзулардан бирига айланди. Тумандошимиз Абдулҳай Нусратуллаев ҳам коллежни битирдию қай бир ташкилотга ишга кирсам, деб ўйлаб ҳам ўтирмасдан, кичик корхона очиш таклифини оила аъзоларига билдирди. Шу тариқа “Янги авлод текстил” оилавий корхонаси ташкил этилди. 1,5 йиллик фаолиятга эга мазкур корхона ўтган йилнинг ўзида 200 миллион сўмлик маҳсулот ишлаб чиқарди. 

— 48 миллион сўмлик банк кредити эвазига 9 та тикув машинаси харид қилганмиз, – дейди биз билан суҳбатда ёш тадбиркор А. Нусратуллаев. — 10 нафар ходим меҳнат қилаётган корхонамиз томонидан аҳоли буюртмасига кўра кийим-кечак тикилаётгани билан бирга йирик саноат корхоналарига ҳам иш кийимлари етказиб бераяпмиз. Ҳозирда Навоий конметаллургия комбинати давлат корхонаси, “Навоийазот” акциядорлик жамияти ва бошқа корхоналар билан ҳам шартномаларимиз бор. Бугунги кунда ижарада туриб фаолият юритаётган бўлсак, жорий йил якунига қадар мазкур бинони харид қилмоқчимиз.

Бу фаолиятимизни кенгайтириш, даромадларимиз ошишида муҳим саналади. 

Мазкур корхона ўз йўналишини кенгайтириш борасида ҳам қатор ишларни олиб бормоқда. Яқинда беданачиликка қўл урилиб, тухум йўналишида 1200 бош бедана келтириб, парваришлана бошланди. Эндиликда бедана жўжаларини шу ернинг ўзида етиштириш имконини берувчи технология ўрнатиш ишлари олиб борилмоқда. Мазкур иш амалга ошса корхона ҳар 32 кунда 14 мингта жўжа етиштириш имкониятига ҳам эга бўлади.

Яна бир карманалик якка тартибдаги тадбиркор Башорат Тожиева ҳам 2014 йилда ҳунармандчилик асосида нақшинкор чорпоя, хонтахта, зина, диван каби маҳсулотлар тайёрлашни йўлга қўйган эди. 4 нафар киши иш билан банд бўлган субъект томонидан ҳар ойда мазкур турлардаги ўртача 10 та маҳсулот ишлаб чиқарилмоқда.

— Банкдан 14 миллион сўмлик кредит олиш ҳаракатидамиз, – дейди биз билан суҳбатда Б.Тожиева. – Бунинг эвазига тахтага нақш чизиш ускунасини харид қилмоқчимиз. Иш ўринларини кўпайтириб, корхона фаолиятини яхшилаш учун устахона қуриш мақсадида туман ҳокимлигига ер ажратиш борасида ариза билан мурожаат қилганмиз. Ҳозирча хатимизга жавоб олмадик. Келгусида ана шу ишимиз амалга ошса, бу биз учун муҳим аҳамиятга эга бўларди.

Корхона яқинда туманда ўтказилган “Ташаббус — 2017” кўриктанловида иштирок этиб, юқори натижани қўлга киритди. Бу, албатта, субъект фаолияти истиқболли эканлигини ҳам кўрсатади.

Умуман олганда, маҳаллаларда истиқомат қилаётган оилаларнинг бозор талабларидан келиб чиқиб турли йўналишлардаги корхоналар ташкил этишаётгани нафақат ўзлари, балки ўша ҳудуд учун ҳам катта аҳамиятга эга бўлмоқда. Шу билан бирга уларнинг истиқболли фаолияти тадбиркорлик ҳар бир оила турмуш фаровонлигини таъминлайдиган муҳим омиллардан эканлигига исбот бўлмоқда.

Озод МУСТАФОЕВ.

Суратлар муаллифи Сирож АСЛОНОВ

22.05.2017

Подробности

Категория: Iqtisodiyot

Просмотров: 635

ТАДБИРКОРЛИКДАН ФАРОВОНЛИК САРИ

Туманимизнинг “Дўстлик” маҳалласи ўзининг тадбиркорлари, деҳқонлари ҳамда ҳунармандлари билан нафақат ҳудуд, балки вилоят миқёсида ҳам кўпчиликка таниш саналади. Бугунги кунда маҳалла аҳолисининг тадбиркорликка қизиқиши тобора ортаётгани ҳудудда ишбилармонлик муҳити яхшиланаётганидан дарак беради.

– Маҳалламизда 50 тадан ортиқ кичик бизнес субъекти фаолият юритмоқда, – дейди МФЙ раиси А. Аҳмедов.

– Аҳолининг банкдан кредит олиб, паррандачилик, чорвачилик, иссиқхоначилик, лимончилик каби йўналишларда иш юритишга қизиқиши ортиб бораяпти. Биргина мисол, жорий йилнинг февраль-март ойларида банклар билан ҳамкорликда ҳар бир бир хонадонга кириб, имтиёзли кредитлар таклиф қилганимизда 128 нафар ишсиз аҳоли 400 миллион сўмга яқин кредитлар олишига эришилди. Айни пайтда ҳам улар ўз йўналишларида муваффақиятли иш олиб боришмоқда.

Эргаш Жумаев “Дўстлик”нинг ёш, ташаббускор тадбиркорларидан. 8 йилдан буён тадбиркорлик билан шуғулланаётган Э. Жумаев аввалига якка тартибдаги тадбиркор сифатида давлат рўйхатидан ўтиб иш олиб борган бўлса, айни пайтда “Турсун Ислом ўғли” деҳқон хўжалигини бошқариб келаяпти. Хўжалик негизида паррандачилик кенг йўлга қўйилган бўлиб, айни пайтда 4 нафар ишчилар томонидан 1000 бош тухум йўналишидаги товуқ, 1800 бош гўшт йўналишидаги бройлер жўжа парваришланмоқда.

– Йилига 20 тонна парранда гўшти, 300 минг донадан ортиқ тухум етиштирамиз, – дейди биз билан суҳбатда Э. Жумаев.

– Бундан ташқари, бозорларимизга 12 тонна эртапишар ҳамда кечпишар картошка ҳосили етказиб берамиз. Корхонамиз даромадларидан фаолиятимизни кенгайтириб, иш ўринлари яратиш, янги тармоқларни ишга туширишга сарфлаяпмиз.

Яна шуни таъкидлаш керакки, “Дўстлик” маҳалласида тадбиркорлар томонидан новвойхона, беданачилик, балиқчилик каби йўналишларда олиб борилаётган ишлар ҳам диққатга сазовор. Умуман олганда, ҳудудда кичик бизнеснинг юксалаётгани маҳаллага ўзгача файз, тароват ҳам бахш этмоқда.

О. МУСТАФОЕВ.  

12.06.2017

Подробности

Категория: Iqtisodiyot

Просмотров: 629

ЭКСПОРТ ШАРТНОМАЛАРИ ИМЗОЛАНДИ

Навоий олимпия заҳиралари коллежида XI ҳудудий саноат ярмаркаси ва кооперация биржаси ўтказилиб, унда 250 га яқин корхона ўз маҳсулотлари билан иштирок этди.

Ярмаркада мебелсозлик, ипгазлама, озиқ-овқат маҳсулотлари, маиший техникалар, қурилиш материаллари намойиш қилинди.

– Корхонамизда коммунал ва бошқа тизимда ишлатиладиган иккиламчи полиэтилен қувурлар тайёрланади, – дейди туманимиздаги “Озодбек пласт” масъулияти чекланган жамияти директори Маҳлиё Ражабова. – Айни пайтда 11 киши меҳнат қилаётган корхонада тайёрланаётган турли диаметр ва қалинликдаги қувурларга талаб ортмоқда. Жорий йилда йўлаклар учун мўлжалланган брусчатка ва бетон плиталар ишлаб чиқаришни йўлга қўйдик. Ярмаркада харидорлар ва ишлаб чиқарувчилар билан қатор шартномалар имзолаб, пеноблок ишлаб чиқариш линиясини харид қилиш бўйича ўзаро келишувга эришдик. Энди янги турдаги маҳсулот тайёрлаб, даромадни кўпайтириш ниятидамиз.

Икки кун давом этган ярмарка доирасида ишлаб чиқарувчилар ўртасида янги техника ва воситалар, технологиялар, маҳсулот ҳамда хизматларни харид қилиш юзасидан 80 миллиард сўмликдан ортиқ ички, қарийб 4 миллион долларлик экспорт шартномалари имзоланди.

Ўз мухбиримиз.

 Сурат муаллифи С. АСЛОНОВ.

 04.05.2017